Ven, 04 Set 2015, 9:23
Asunto: Borrador regulamento Circuíto
Copiamos aquí a proposta de regulamento para esta tempada. A idea é saber se queda claro (tanto para veteranos
circuiteiros coma para os novos), se hai algo que engadir ou se atopades erros.
Graciñas polos comentarios.
- - - - - - - - - - - - - - - - - - - - -
Regulamento
As normas do xogo
O Circuíto Galego de Carreiras Populares 2015-16 (o Circuíto) é un xogo aberto a calquera persoa que lle guste correr e participar nas carreiras populares, con inscrición gratuíta e autoxestionado polos propios participantes.
Comeza na primeira fin de semana de setembro de 2015 e remata na derradeira de xuño 2016.
Funcionamento
No Circuíto sumas puntos en cada carreira que participes aínda que chegues de último. Neste xogo é máis importante a regularidade co posto acadado nas probas e, polo tanto, os últimos si poden ser os primeiros.
A cousa vai así:
- Participas nunha carreira puntuable (ver listaxe).
- Consultas o teu posto na clasificación xeral definitiva.
- E vas ao apartado Enviar posto para sumar os puntos acadados.
Podes enviar un máximo de 40 resultados ao longo da tempada e o envío de puntos de cada carreira péchase 15 días despois de subidos os resultados.
Os puntos que sumes irán á clasificación xeral de ruta, a de montaña se é o caso e a de parellas ou equipos se participas nestas modalidades.
Inscricións
A inscrición é gratuíta. Os únicos requisitos para participar son ter 18 anos cumpridos a 1 de setembro de 2015, unha conta de email e un móvil.
Ata o 30 de setembro estará aberto o prazo para reinscribirse de xeito individual. Se algún participante non repite inscrición na 1ª ou 2ª división a súa praza será ocupada por aqueles que quedaron ás portas do ascenso na tempada anterior.
/ Inscricións e reinscricións a partir do 7 de setembro de 2015 aquí
Carreiras e puntuación
As probas puntuables as podes consultar nesta listaxe, que se actualizará a medida que se confirmen as datas de novas carreiras. Se es organizador e queres incluir de xeito gratuíto a túa proba, vai ao apartado Contacto para engadila.
Cada carreira de ruta ten un coeficiente en función da súa distancia dende 1 para probas de menos de 6 km ata 5 o maratón. En función de ese coeficiente, o teu posto e o total de chegados á meta calcúlanse os puntos segundo a fórmula:
xxx Gráfico coa fórmula xxx
Para probas de montaña (trail) a cousa cambia. Teñen un coeficiente máximo de 5 para que puntúes na clasificación de ruta e outro máis elevado para sumar na clasificación de montaña. Este outro coeficiente ven determinado pola distancia e o desnivel positivo da proba.
Modalidades
Para facelo máis divertido o Circuíto conta con varias clasificacións.
- Clasificación xeral individual de ruta - Con 1ª, 2ª e 3ª división xeral, feminina e masculina.
- Clasificación por parellas - xeral e mixtas.
- Clasificación por equipos - Con 1ª, 2ª e 3ª división.
- Clasificación xeral de montaña - Con división única xeral, feminina e masculina.
- Clasificación por localidades - ¿Quen é o mellor de cada lugar?
- Clasificación entre localidades - ¿Onde corren máis?
- Clasificación por categorías - A partir dos 35 en rangos de 5 anos.
As puntuacións para parellas, equipos, localidades e categorías cóllense da clasificación xeral de ruta.
Individual de ruta
A 1ª e 2ª división individual estarán compostas por 200 corredores cada unha en base ás tempadas anteriores e con descenso dos 40 derradeiros postos.
Na 2ª e 3ª división individual conseguirán o ascenso os 40 primeiros postos. Todas as novas inscricións empezarán a súa andaina no Circuíto na 3ª división.
Equipos
Os equipos están formados por 6 corredores no que un deles é o capitán. Para esta clasificación sumaranse as 5 mellores puntuacións dos compoñentes do equipo, descartando sempre ao que leve menos puntos.
A 1ª e 2ª división estará formada por 20 equipos en base ás participación en tempadas anteriores e con decenso dos 5 últimos de cada unha delas.
Da 2ª e 3ª división ascenderán os 5 primeiros equipos clasificados. Os novos equipos empezarán na 3ª división.
/ Se queres inscribir unha parella ou un equipos clic aquí
Incidencias
En caso de que non aparezas nunha clasificación por un erro de cronometraxe ponte en contacto coa organización da proba para que o corrixa.
Se o teu nome non aparece no listado definitivo da carreira non podemos sumar os teus puntos para o Circuíto.
Descualificacións
Se algún corredor falsea os datos de inscrición nalgunha das probas incluídas ou é sorprendido correndo por outro participante perderá todos os puntos da tempada e non poderá seguir enviando resultados.
Outros
O non previsto no Regulamento resolverase segundo o criterio da organización ou mediante consulta pública no foro oficial do Circuíto.
Circuito Galego de Carreiras Populares 2015-16
Correr en Galicia
Última edición por O_Circuito o Sáb, 05 Set 2015, 15:43; editado 1 vez